Sila si Rolex Jaboc, 31, taga Calatrava, Negros Occidental ug iyang ig-agaw nga sila si Bernard ug Alvin Caramihan, giubanan ni Atty. Aquilino Felicitas sa pagluwat og affidavit nga nagtumbok kang Alex Ibaño, 37, ug sa inahan niining si Allen nga maoy nagpaluyo sa ilang pagtulis sa Exquisite.
Matud pa sa tulo atol sa imbestigasyon sa buhatan ni Theft and Robbery Section chief Alexis Reldo, nga gawas sa pagtulis sa Exquisite, plano nilang tulison ang usa ka wala mailhing tawo nga nag-withdraw sa ATM booth sa Landbank.
Sumala pa ni Jaboc nga miabot siya dinhi sa dakbayan sa unang semana sa Abril ug nagsaka sa panimalay sa igsuon sa iyang asawa sa Jaclopan, Talisay diin niya nakaila ang inahan ni Alex nga anaa magpuyo sa duol nga balay.
Matud pa niya pipila ka adlaw sa iyang pagpuyo sa Jaclopan, giimbitar siya sa balay sa mga Ibaño diin didto ilang giplano nga tulison ang Exquisite.
Giasoy ni Jaboc nga gisultian siya ni Alex nga papangitaon siya og laing duha ka kauban nga "kasaligan" hinungdan nga iyang gi-text ang magsuong Caramihan nga paanhion sa Cebu kay may trabahong nagpaabot.
Pipila ka adlaw sa pag-abot sa magsuong Caramihan, gitapok sila ni Alex ug giplano ang pagtulis sa Exquisite dungan ang paghatag nila og mga armas.
Sumala pa ni Jaboc nga plano nilang ihatod sila sa sakyanan ni Ibaño ug kun molampos ang pagtulis mosakay sila og PUJ paingon sa Colon apan manaog lang sa unahan aron mosakay og PUJ paingon sa Talisay ug lahos na ngadto sa balay ni Ibaño sa Jaclopan.
Silang Jaboc, Bernard ug Alvin Caramihan nasikop sa kapolisan human sa pagtulis sa pawnshop. Apan sa wala pa, nakigpinusilay una sila sa kapolisan sa Pardo Police Station.
Si Alvin mi-hostage sa empleyada sa pawnshop nga si Jovelyn Jumao-as, apan walay suwerte tungod kay nadakpan kini.