Lolo gipatay sa iyang balay

Gipusil patay ang usa ka lolo sulod sa iyang pinuy-anan sa usa sa duha ka wala mailhing tawo pasado alas 10 sa gabii niadtong Biyernes sa Sitio Lomboy, Victoria, San Remegio, Sugbu.

Base sa report sa kapolisan nga ang biktima giila nga si Rosendo Tanquilo, 87, biyudo ug residence sa naasoy''ng dapit kinsa mamuhatay og basket aron ibaligya sa mga mananagat.

Ang biktima nakaangkon og samad sa liog gamit ang wala matinong kalibre sa armas.

Duha ka wala mailhing lalaki ang gitumbok sa kapolisan nga maoy responsable sa krimen.

Gituohan sa kapolisan nga tulis ang motibo sa pagpamusil patay sa biktima.

Si Allan Miscala, barangay konsehal maoy nanawag sa mga polis ug nagpahibalo sa nahitabo.

Misaysay si SPO1 Ernesto Alburo sa San Remegio Police Station sa Banat News nga wala pa mahitabo ang krimen nianang pasado alas 6 sa gabii dunay duha ka wala mailhing tawo nakit-an sa anak babaye nga duol sa gipuy-an niining biktima diha sa basketan nga nagbarog-barog.

Apan ang anak babaye sa biktima wala makaklaro sa mga nawong tungod kay misawop na ang adlaw ug medyo ngitngit na.

Matud ni SPO1 Alburo ang usa sa duha ka suspek mituktok ug nagpasumangil nga modagkot og sigarilyo.

Sa dihang giablihan ang pultahan sa biktima gideretso''g pusil sa usa ka suspek tumong sa liog sa biktima samtang ang kauban maoy gihimong look-out.

"Naa gyuy plano sa tulis kay bag-o ra man ni nagpista sa ilang sitio unya kining biktima maoy pangulo, basin gimonitor nang daan ba kay ang kuwarta, kay og mangita tag laing motibo wala na tigulang naman ning biktima. Walay nakuha kay gideritso mani siya og pusil," dugang asoy sa maong polis.

Pagkakaron blangko pa gihapon ang kapolisan sa pagtumbok sa responsable sa krimen ug padayon pa ang ilang imbestigasyon.