Daling mitaho sa kapolisan sa Talisay sila si Leo Aviola, 30-anyos, taga Azienda Milan, Barangay Maghaway ug Neil Elmo Doquitos, 16, residente sa Camella Homes Lawaan I sa nahisgutang dakbayan kabahin sa insidente.
Si PO2 Leandro Azarcon, duty desk officer mibutyag kagahapon sa Banat News nga si Aviola ug Doquitos nagsakay og jeep pasaheroan gikan sa dakbayan sa Sugbu paingon na nga mopauli.
Ang nahisgutang tulisan misakay usab sa PUJ nga gisakyan sa duha ug pag-abot diha sa lugar nga nahitaboan mideklarar kini og "hold-up" dayon tion sa pusil niini ngadto ni Aviola ug Doquitos.
Nasakmit sa tulisan gikan ni Aviola ug Doquitos ang Motorola V3 nga cell phone nagkantidad og P15 mil ug Nokia 6230 nga nagkantidad og P10 mil.
Matud ni Azarcon nga gigukod sa iyang mga kaubang polis ang nahisgutang suspetsado kinsa diha miagi ubos sa tulay sa Mananga apan wala na kini maapsi.
Si PO2 Joel Rosales polis sa siyudad sa pakighinabi kagahapon sa Banat News nagkanayon nga sobra na 20 ka kasong pagpanulis ang natala niining tuiga sa ilang talaan diin uban niini wala pa gyud masulbad tungod kay walay mobarog nga testigos batok sa mga suspetsado.
Kahinumduman nga ang kapolisan sa siyudad mibutyag nga ang Sityo Mananga ang kasagarang daganan ug tagoan sa mga tulisan.
Niining bag-o lang usa ka giingong akyat bahay ang gipusil, patay sa usa ka wala mailhing tawo ug ang kapolisan sa siyudad padayon pa sa ilang imbestigasyon sa maong hitabo.