Sesyon sa Mandaue napakyas

Napakyas sa pagpahigayon sa ilang regular session sa miaging Martes ang mga sakop sa konseho sa dakbayan sa Mandaue sanglit wala makatambong ang mayoriyang sakop niini.

Si Konsehal Carlo Fortuna mao unta ang nahimong presiding officer apan nakahukom kini sa dili na lamang pagpahigayon og session sanglit wala man makaabot sa quorum silang mga konsehal nga nanambong.

Naglakip sa nanambong mao sila si ABC Federation President Jovita Tuela Joy Ouano, Sanggunian Kabataan Federation President Cristabel Cuizon, Konsehal Rosita Benabaye ug Konsehal Carlo Fortuna.

Napakyas sa pagtambong sila si Konsehal Raul Cabahug, Konsehal Allan Borbajo kinsa pulos anaa sa katapusang termino ug Konsehal Glenn Bercede.

Ang sanggunian secretary nga si Frelyn Mabanag miingon nga si Acting Vice Mayor Jonas Cortes wala makatambong tungod kay mitambong kini sa hearing sa giduso nga petisyon sa Comelec Region 7 batok kang mayoralty candidate Edgar Jon Cortes.

Si Cortes sama kang mayoralty candidate Jonkie Ouano kinsa misang-at usab og petisyon batok kang Lolita Ouano nga kandidato usab sa pagka mayor sa Mayo 14 nga piniliay.

Show comments