Pataka’g papilit ikiha – Comelec

Mibahad ang kadagkuan sa Commission on Elections sa pagpasaka og kaso niadtong mga kandidato nga masakpang magpataka og patapot sa ilang mga campaign poster sa mga lugar nga wala gikonsiderar nga designated common poster area sa umaabot nga piniliay karong Mayo.

Gibutyag ni Comelec-7 assistant regional director Atty. Leonil Marco Castiliano nga bisan kadto lang mga sinugo sa kandidato nga masakpan nila sa akto nga nagpataka og patapot sa mga campaign poster ila gyud kining dakpon ug pasakaan og kaso.

Apan giklaro ni Castiliano nga kadtong mga kandidato nga nagsugo sa pagpatapot sa ilang mga poster pasakaan nila sa kaso nga kalapasan sa Fair Election Act.

Hinuon giangkon ni Castiliano nga medyo maglisod sila sa pag-probar sa nahimong kalapasan sa maong kandidato ilabi na kun ang mga madakpan nilang sinugo dili mokooperar sa ilang kaso nga isang-at.

Pagkakaron nagsige ang mga kawani ug kadagkuan sa Comelec apil na ang mga volunteer sa pag-monitor og pagpanglaksi niadtong mga campaign poster nga gipataka lang og patapot sa bisan asang lugar dinhi sa dakbayan nga wala gikonsiderar nga common poster areas.

Giangkon ni Castiliano nga pagkakaron nagsige lang sila og pagpanglaksi sa mga campaign poster apan wala pa gyud silay bisan usa ka politiko nga napasakaan og kaso gumikan kay magkawatkawat man usab og patapot sa mga poster ang mga sinugo niini.