Si Jonathan Guardo kandidato pagka-kongresista sa oposisyon atbang ni Kongresista Antonio Cuenco mibutyag nga nabalaka sila sa presensya sa mga armadong tawo nga naglibod suroy karon sa mga bukirang barangay sa south district.
Natahap si Guardo nga ang presensya sa mga armadong tawo adto kini mopabor sa kampo nila ni Mayor Tomas Osmeña ug Cuenco sa BOPK sa umaabot piniliay.
Gihan-ay pa karon sa mga abogado sa oposisyon ang ilang petisyon nga iduso sa Comelec sunod semana.
Samtang gipadayag ni Comelec-7 assistant regional director Atty. Leonil Marco Castiliano nga mahimo lang mapaubos sa Comelec control ang usa ka lugar kon duna kiniy seryosong hulga sa kahusay ug kalinaw.
Hinoon gipadayag ni Castiliano nga paabuton pa nila ang pormal nga petisyon sa kampo sa oposisyon nga maduso sa ilang buhatan una pa sila mohimo og pakisusi sa kabalido sa maong petisyon.
Ang maong petisyon matod ni Castiliano maoy ilang basihan aron mo-rekomendar ngadto sa Comelec en banc nga mapaubos sa Comelec control ang usa ka lugar.
Samtang si Sr.Supt. Patrocinio Comendador, direktor sa Cebu City Police Office mitug-an nga paabuton pa usab nila ang desisyon sa Comelec.
Ang Comelec ug PNP dunay gisunod nga sukdanan una pa mopailawom sa usa ka lugar sa Comelec control, kini kung duna nay kasaysayan ang nahisgutang mga dapit nga bayolenteng eleksyon, dunay presensya sa mga rebelde, higpit kaayo ang panagribal sa mga kandidato.
Sa pagkakaron matud pang Comendador wala pa silay nakitang timailhan nga dunay susamang mga panghitabo diha sa maong dapit gawas lang sa pipila ka mga reklamo gikan sa habig sa oposisyon nga hangtud karon wala gihapon nila makumpirmar ang presensya sa maong mga armado.