Dul-an sa P1M aprobado para sa mga nasunogan

Dul-an sa usa ka milyon ka pesos nga pundo gikan sa kagamhanan sa dakbayan sa Sugbu ang giaprobahan sa konseho aron ihatag nga hinabang ngadto sa mga pamilyang nasunogan diha sa barangay Mambaling ug Basak San Nicolas niadtong milabay'ng bulan.

Si Konsehal Gerardo Carillo, chairman sa committee on social services, maoy nangamahan sa resolusyon nga giaprobahan sa milabay'ng sesyon sa konseho niadtong milabay'ng Miyerkules sa miaging semana.

Mokabat sa P643,791 ang giaprobahang gahin alang sa mga pamilyang nabiktima sa sunog sa Sityo Panagsama, Basak-San Nicolas niadtong Marso 23 ug laing P183,208 ang gi-aprobahang gahin alang sa mga pamilyang nasunogan sa Alumnos,Mambaling niadtong Marso 19.

Ang maong gahin gamiton sa pagpamalit og mga material assistance sama sa mga plywood ug sin ug uban pang mga kagamitan sa panimalay nga ihatag ngadto sa mga nasunogan.

Samtang laing resolusyon ni Carillo nga giaprobahan sa konseho ug kini mao ang pagpangayo og P500,000 nga pundo nga maoy gastuhon pagbag-o sa Multi- Purpose building sa Sityo Lawis, barangay Mambaling.

Ang maong gahin adto kini kuhaon sa siyudad gikan sa pundo sa calamity fund.