Isnatser nga nangulata'g babaye nadakpan

Nasikop sa kapolisan sulod sa usa ka videoke house sa Tabunok Talisay kagahapon sa kaadlawon ang usa ka 26-anyos nga lalaki kinsa gipasanginlang misakmit sa cellphone, P500 nga salapi ug mikulata sa tag-iya niining babaye nga tindera og isda diha sa nahisgutang barangay.

Ang biktima kinsa nakaangkon og bun-og sa iyang lawas giila sa mga polis nga si Elizabeth Reyes, 36, taga Sitio Salvador, Tanke Talisay.

Ang suspetsado mao si Ramonito "Monet" Basillote, taga Sitio Ilang-Ilang, Lagtang sa nahisgutang dakbayan.

Base sa imbestigasyon sa kapolisan sa dakbayan nga si Reyes naglakaw diha sa bag-ong merkado sa Tabunok ug gisundan kini ni Basillote.

Si Basillote gipasanginlang mipugos sa pagkuha sa Nokia 8250 nga cellphone ni Reyes nga nagkantidad og P1,300 ug P500 niini.

Apan gikulata ni Basillote si Reyes dihang nagdumili kini sa paghatag sa nahisgutang butang ug kwarta.

Si Basillote nasikop sa gipahigayong follow-up operation sa grupo sa alert team sa kapolisan sa dakbayan pinangulohan ni SPO1 Ricardo Balbutin diha sa nahisgutang imnanan.

Si SPO2 Noel Factores, duty desk officer, mibutyag kagahapon sa Banat News nga si Basillote mihimakak sa nahisgutang pasangil batok kaniya.

Matud ni Factores nga wala na mabawi ang cellphone ug salapi ni Reyes nga posibleng gihurot na og gasto sa suspetsado.

Si Factores midugang nga si Reyes mibahad nga mopasaka og kaso batok ni Basillote.