Gibutyag ni Konsehal Procopio "Coping" Fernandez, tsirman sa Committee on Police nga ilahang gikasabutan nga ang tanang mga sakop sa Parish Security Group (PSG) maoy mangunay sa pagbantay aron mapatunhay ang siguridad sa mga manimbahay sa nagkalain laing simbahan sa dakbayan.
Samtang gikasabutan atol sa mao nilang meeting nga ang mga polis motutok sa paghatag og siguridad sa bagang duot sa katawhan nga mosaksi unya sa re-enactment sa Buhing Kalbaryo diha sa simbahan sa Guadalupe.
Ang mga tanod sa kabarangayan gitahasan sab nga maoy magbantay sa palibot ilabina sa mga panimalay aron kalikayan nga mopahimulos sa higayun ang mga kawatan sama sa akyat bahay.
Matud sa konsehal nga ang kapulisan gipasidan-ang alerto kanunay aron makatubag diha diha kun dunay motumaw nga mga alarma.