Gullas di mokomento bahin sa kiha ni Garganera batok kang Tomas

Si Kongresista Eduardo Gullas sa unang distrito sa Sugbu nagdumili sa paghatag og pamahayag kabahin sa pasangil ni Mayor Tomas Osmeña nga adunay gamhanan nga tawo nga nagpaluyo ni Tinago Barangay kapitan Joel Garganera.

Nagkatawa nga nagkanayon ngadto sa mga tigbalita si Gullas nga dili siya mohatag og komento kabahin sa nahisgutang pasangil ni Osmeña.

Kahinumduman nga si Garganera misang-at og kaso ngadto sa korte para mapugngan si Osmeña nga makabaligya ug makapaabang sa South Reclamation Project ngadto sa mga negosyante.

Si Garganera mipasangil nga ilegal ang gibuhat karon ni Osmeña nga pagpamaligya ug pagpaabang sa mga luna diha sa SRP ngadto sa mga negosyante tungod kay nagkinahanglan pa kini og pagtugot sa kongreso.

Si Gullas sa iyang bahin nagkanayon nga wala niya mabasa ang gidusong reklamo ni Garganera ug nahibaw-an lang niya sa mga pamantalan ang nahisgutang reklamo sa barangay kapitan.

Ang kongresista mibutyag nga ang pangalan gyud unta sa nahisgutang proyekto "Cebu City South and Talisay Reclamation" apan gikanselar ang Talisay maong gitawag na kini karon og "Cebu City South Reclamation".

Ang proyekto nasugdan dihang naluwat ang Presidential Proclamation 763 dayon milusot ang "patent" niini human ang "title".

Matud ni Gullas nga adunay mga lugar sa nahisgutang luna nga gitukoran sa proyekto nga kinahanglan pang i-reclaim tungod kay underwater pa kini.

Si Garganera dili gusto nga mobaligya ang kagamhanan sa Sugbu ug magpaabang sa nahisgutang proyekto apan ang kagamhanan sa Talisay sukwahi og baroganan diin ang konseho sa siyudad mipasar og resolusyon nga nagtugot sa dakbayan Sugbu sa pagpamaligya ug pagpaabang ngadto sa mga negosyante sa mga lote diha sa SRP bisan pa sa bangi sa duha ka dakbayan kabahin sa land dispute.

Apan gitataw sa kongresista nga ang kagamhanan sa Sugbu ug ang mga investors manubag kung ang korte mopakanaog na og hukom nga aduna gyuy nahitabong encroachment diin nalakip sa pag-reclaim sa Sugbu ang sobra 50 ektaryang luna sa Talisay.

Si Gullas midungag nga igo lang nilang giprotektahan ang territorial integrity sa Talisay.