Si Ariel Guardo, ig-agaw ni Jonathan "Atan" Guardo kinsa gikatahong maoy makig-atbang kang Rep. Antonio Cuenco karong piniliay, midangop sa buhatan sa Service Security Group sa Cebu City Police Office niadtong milabay'ng adlaw.
Matud pang Ariel Guardo samtang sila nag-uban sa iyang ig-agaw nga si Philip Guardo diha sa maong barangay gibabagan sila og pito ka mga lalaki nga pulos armado og high-powered firearms ug nagsuot og itom nga mga uniporme.
Ang nakapahibulong kanila mao nga walay karatola sa Comelec ang maong checkpoint nga maisip nga usa ka iregularidad sanglit ang Comelec mimando sa kapolisan nga butangan gyud og karatola sa Comelec ang ilang mga operasyon diha sa kadalanan panahon ning eleksyon.
Sumala pa gipangayuan pa nila og ID ang maong mga lalaki apan wala mabutang diha sa blotter sa kapolisan kung mipakita ba og ID ang maong mga armadong lalaki.
Dako ang pagtuo sa duha nga dili mga sakop sa PNP ang maong mga lalaki maong ilang gisumbong sa kapolisan ang insidente.
Si Sr.Supt. Mariano Natuel, hepe sa Service Security Group sa pakighinabi sa Banat News nagkanayon nga ilang susihon ang maong reklamo.
Usa pa matud pang Natuel nga kung duna may chekpoint ang laing police units nga gihimo diha sa maong dapit wala kini mananghid sa police detachment sa maong lugar ug diha sa SSG sanglit patakaran na ang maong pamaagi.
Sumala pang Natuel nga duna na silay mga nadawat nga mga report kabahin sa mga armadong mga tawo diha sa bukirang barangay sa dakbayan apan dihang ilang gisusi pulos kini negatibo.
Matud pang Natuel nga nasayran nilang ang grupo nila ni Ariel Guardo ang maong mga lalaki nga nangabot ug base sa paghulagway sa mga residente ngadto sa mga polis may bulok politika ang ilang kalihukan.