Gibutyag ni Benatiro nga sayop ang nigawas nga mga balita sa radyo ug lokal nga pamantalaan tungod kay igo lang siyang nibutyag nga dili siya motuo nga mag-apil apil si Col. Loot sa politika tungod kay nasayod kini nga supak sa ilang serbisyo ug sa Comelec,"Dili ko motuo nga mag-apil apil si Vic Loot sa pagpangampanya sa iyang asawa kay siya may delicadeza",dugang asoy ni Benatiro.
Si Benatiro nga kandidatu pagka konsehal sa lungsod sa Daan Bantayan ubos sa pundok oposisyon nga gipangulohan ni Engr. Augusto "Dodong Itok" Corro nga maoy moatbang sa anak ni Mayor Loot nga si Sun Shimura.
Gitubag sab ni Benatiro ang hagit ni Loot nga maoy molansar pagka mayor atbang sa iyang anak apan andam kini niyang dawaton kon si Col. Loot maoy molansar atbang kaniya.
Apan bisan pa niini giangkon ni Benatiro nga padayon siyang naglaom nga magkauli ang ilang maayong relasyon nila ni Col. Loot ilabi na kay sa nilabay'ng eleksyon magkauban sila ug nitabang pa siya sa kampanya sa kandidatura sa iyang asawa nga si mayor Loot.
Gidugang ni Benatiro nga walay balidong sukaranan ang gidemanda ni Col. Loot nga mag-public apology siya gumikan kay wala siyay dautang nabuhat ug gani ang pamilyang Loot pa ang nakautang niya og kabubut-on dihang iyaha kining gitabangan sa nilabay'ng eleksyon.