Ang operasyon gilangkuban sa hiniusang pwersa sa Theft and Robbery Section, Talamban Police Station, Criminal Investigation and Intelligence Branch ug Vice Control Section inabagan sa mga opisyales sa Talamban pinangulohan ni Kapitan Nilo Tariman.
Giila ang gidakop nga mao si Gerrjan Manago,alyas Jan, 25, lumad nga taga Aguada St. sa Ozamiz City ug kasamtangang nagpuyo sa Villa Del Rio sa Talamban.
Si Manago gidakop uban sa iyang ig-agaw'ng babaye atol sa gihimong checkpoint sa kapolisan diha sa dalan Panagdait sa Kasambagan human makakuha og impormasyon gikan ni Tariman ang kapolisan nga kini maoy gisak-an sa mga tulisang mitulis sa Jonas Borces Beauty Studio niadtong milabay'ng Huwebes sa gabii.
Usa sa mga tulisan ang napatay ug giilang si Rico Lumantas, 57, giingong sakop sa MIG9 sa ISAFP nga taga Zamboanga City human misukol ni PO2 Antonio Din sa MPG nga diha sa maong parlor niadtong tungora.
Sumala pang Tariman sa mga tigbalita nga ang sakop sa Lupon nga si Florentino Cano,Jr. nga trabahante ni Manago maoy nihatag kanila og impormasyon human mamatikdi ang kalihukan sa duha ka mga nakaikyas nga tulisan.
Gikatahong miabot ang tulo ka wala mailhing mga lalake niadtong Huwebes sa hapon diha sa litsonan ni Manago diin usab magtrabaho si Cano ug siya maoy gibinlan ni Manago sa tulo aron atimanon ug pakan-on.
Nianang pagkagabii nakit-ang milakaw ang tulo ka mga bisitang lalake sakay sa motorsiklong pula nga iya sa litsonan ni Manago, apan nahibulong si Cano nga sa pagbalik nila duha na lang ang nahibalik ug naghaguros ang motorsiklo nga gidasmag ra sa kilid sa balay ni Cano.
Ang usa mipahatud kang Cano sa balay ni Manago sa Villa del Rio samtang ang usa nagpabilin dala ang usa ka bag. Giingong si Manago ug ang lalakeng bisita misakay dayon og sakyanan ug mibalik sa balay ni Cano diin usab gihapit ang nahibiling kauban.
Sumala pang Tariman ug mga polis base sa pamahayag sa mga testigo sa tulis, mitakdo sa diskripsyon sa mga tawong bisita ni Manago ang tulisan.
Si Sr. Supt. Patrocinio Comendador nagkanayon nga si Manago ang naghatag og kapuy-an, sakyanan ug mipakaon sa mga tulisan hinungdan nga siya maoy gidudahang lokal nga kunsabo sa tulo.
Sumala pang Sr. Inspector Alexis Relado, hepe sa TRS nga sa gihimong interview kang Manago miangkon kining iyang gipakatulog sa iyang awto ang duha ug gihatud nianang pagkaadlawon sa pantalan ug nanakay og barkong padulong sa Dumaguete.
Ang bag nga nahibilin sa tulisan diha sa balay ni Cano dihang gihiling nakuhaan og usa ka kalibre .38 revolver nga may unom ka buhing bala, usa ka kalibre .45 nga pistolang may sulod nga lima ka buhing bala, tulo ka posas.
Samtang si Manago atol sa pagdakop gikatahong nakuhaan og usa ka dakong pakete sa gidudahang shabu nga gibana-banang singko gramos ang gibug-aton.
Narekober usab ang motorsiklong giingong maoy gigamit sa pagpanulis.
Apan si Manago sa interbyu sa mga tigbalita kusganong mihimakak nga nakuhaan siya og shabu, samtang kabahin sa pagtulis wala na kini mokomentaryo.
Ang iyang manlalaban nga si Atty. Salvador Solima nagkanayon nga nasaypan ra ang iyang kliyente ug ang nahimo lang niining sayop mao ang pagkamatinabangon.
Matud pa niya nga si Manago kinsa manager karon sa usa ka kumpanya sa orange juice kanhi usab manager kaniadto sa usa ka softdrink company sa Ozamiz ug posibleng ang mga tulisan nagpakaaron ingnong magpatabang nga makatrabaho sa iyang litsonan pero duna diay silay dautang tuyo dinha.