Kini ang gipadayag ni Sec. Cerge Remonde, director general sa Presidential Management Staff atol sa iyang pagpakigpulong sa Government Infrastructure Forum sa Sugbu kagahapon.
Matud pa ni Remonde nga mismo siya isip Sugbuanon ang gibati og kauwaw sa maong taho.
Si Remonde sa samang higayon maoy chairman sa Infrastructure Monitoring Task Force apan iyang giklaro nga walay labot sa ilang gimonitor ang mga proyekto nga may kalambigitan sa Asean Summit.
Matud pa ni Remonde nga nakapahimangod kaayo sa Presidente ang maong taho sanglit ang kalampusan ug kadungganan sa nasud human sa Asean Summit naguba lang gumikan niini.
Nunot niini, nanghinaut si Remonde nga tinud-on sa buhatan sa Ombudsman ang ilang imbestigasyon aron mataral sa husgado ang responsabli sa maong anomaliya.
Giimbestigar na karon sa Ombudsman ang maong kaso aron pagsubay kun giunsa sa pagpaburot ang presyo sa dul-an sa 2,000 ka decorative lamps ilabi ang nahimutang sa dakbayan sa Mandaue.
Giingong kapin lang sa tag P20,000 ang matag usa niini apan gikataho nga ang presyo niini nahimo na nga tag P224,000 ang matag usa ka poste ug suga.