Matud pa ni Comelec 7 regional attorney Lionel Marco Castillano nga ila na nga gipaningkamutan nga mausab na ang ilang kasaypanan samtang tulo na ka higayun ang pagpatuman sa partylist system.
Ubos sa partylist system, ang mga botante mopili sa pangalan sa partido sa sectoral ug marginalized sector.
Sa kinatibuk-ang botos nga makuha sa tanang partylists, may kahigayunan nga makapalingkod og usa ka kongresista ang partylist matag dos porsyento nga makuha hangtud sa labing daghan tulo ka kongresista.
Nag-una sa pagkakaron mao ang Bayan Muna diin 17 porsyento ang ilang nakuha sa eleksiyon sa 2004 apan inay walo unta ang ilang kongresista, tulo ra gyud ang nakalingkod subay sa balaud.
Matud pa ni Bayan Muna-Cebu provincial coordinator Arman Perez atol sa Bee Forum:Comelec Hour sa Casino Español kagahapon nga plataporma sa organisasyon ang ilang gipresentar sa katawhan ug dili ang personalidad sa kandidato.
Apan sumala pa ni Perez nga samtang giduso nila ang kausaban sa pamolitika ubos sa partylist system, gipangpatay usab ang ilang mga lider.
Gitumbok ni Perez ang mga lokal nga kagamhanan nga wala usab magtagad sa partylist system.
Matud pa usab ni Ernie Edralin, tigpamaba sa Akbayan Partylist sa Sugbu nga gihingusgan usab nila ang pag-edukar sa mga botante labot sa partylist system.
Ang Comelec maoy mohas-has kon ang usa ka partylist tinud-anay ba gyud nga nagrepresentar sa gagmay'ng sektor nga madala ang ilang tingug ngadto sa Kongreso