Loren Legarda nag-una sa survey sa Pulse Asia

Si kanhi Senador Loren Legarda maoy nanguna sa nationwide senatorial preference survey nga gihimo sa Pulse Asia gikan Pebrero 28 hangtod sa Marso 5 diin 56.8 porsiyento sa 1,800 ka respondents ang mi-uyon kaniya nga 15.7 puntos ang gilay-on sa nakakuha sa ikaduhang dapit.

Si Senador Panfilo Lacson nga kauban ni Legarda sa GO ang nakakuha sa ikaduhang dapit nga adunay 41.1 porsiyentong boto. Misunod si Senador Francis Pangilinan ( 39.4%), Kongresista Francis Escudero sa GO (35.5%), ug Ralph Recto sa administrasyon (35.2%).

Si Legarda nahimong numero unong senador sa eleksiyon niadtong 1998 tungod sa 15 milyones botos nga nakuha niini.

Nahimutang sa ika-unom ngadto sa ika-12 sila si Senador Manny Villar (35.0%), Joker Arroyo (34.5%), Benigno "Noynoy" Aquino (34.2%), Edgardo Angara (32.1%), Alan Peter Cayetano (30.9%), Gringo Honasan (27.3%) ug Vicente Sotto (25.4%).

Sa maong survey, nakita nga unom ka kandidato sa GO ang misulod samtang upat sa Team Unity, samtang duha mga independente.

Nasayran nga si Legarda mi-top usab sa Enero 25 ngadto sa 29 nga Pulse Asia survey diin nakakuha og 46.6 porsiyento nga 12 punto nga gilay-on kang Lacson.

Nanguna usab si Legarda sa Malacañang-commissioned senatorial survey niadtong Pebrero 24 ngadto sa 27 nga adunay 1,500 respondents gikan sa 300 barangays lukop nasud.

Sa survey gikan sa usa ka foreign polling firm, si Legarda nakakuha og 62 porsiyento botos nga 13-puntong panguna sa ikaduhang kandidato. Migawas usab siya nga nanguna sa surveys sa Social Weather Station niadtong Septiyembre 2 ngadto Oktubre 2, 2006. Sa Enero 8 ngadto 18 nga survey sa Ibon Facts and Figures, si Legarda nakakuha usab og 61 porsiyento ug nanguna sa laing survey sa samang survey firm.