Multicab gi-ambush usa patay laing 1 'angol

Usa ang patay samtang samdan ang usa ka biyuda human sa nahitabong ambush diha sa Ybañez Compound sa Mambaling niadtong milabay'ng adlaw.

Gisusi karon sa kapolisan ang anggulong posibleng may kalambigitan sa kaso sa biyuda kabahin sa kamatayon sa iyang bana ang motibo sa maong ambush.

Ang namatay giilang si Glenn Gaballo,24,residente sa Sitio Puntod sa maong barangay ug ang biyudang naangol giilang si Marinel Quijote,29, silingan ra usab ni Gaballo.

Duha ka mga lalaki nga nagsakay og kolor blue nga XRM nga motorsiklo ug armado og kalibre 9mm nga pistola maoy gitumbok nga mibanhig sa mga biktima nga kasamtangang nagsakay og multicab uban nila ni Gilbert Abella ug Jim Romarate.

Si Abella maoy gikatahong nagmaneho sa maong multicab niadtong tungura samtang si Romarate maoy tupad ni Gaballo, ang duha parehong naluwas.

Sumala pa ni PO3 Roger Nedamo sa Homicide Section ang sakyanan sa mga biktima nag-aginod lang og dagan niadtong tungora dihang pag-abot sa maong dapit kalit nga misikit ang motorsiklo sa mga suspek.

Ang backrider niini giingong maoy mibunot og pistola dayong pamusil sa mga sakay sa multicab, si Gaballo naigo duha ka higayon sa ulo samtang si Quijote naigo diha sa tiyan.

Si Romarate daling nakakanaog sa sakyanan ug midagan pasulod sa mga kabalayan apan ang suspek migukod kaniya ug subling mipabuto kaniya dangtan pila ka gutlo sa pagpangita sa suspek ngadto kang Romarate giingong mibiya kini ug mibalik sa motorsiklo dayong nangikyas.

Ang mirespondeng sila si PO1 Edsel Relecto ug PO1 Felipe Lagonoy sa Mobile Patrol group mao nay midala sa mga biktima sa Cebu City Medical Center apan si Gaballo gideklarar nga dead on arrival.

Si SPO3 Dennis Moga mitug-an sa Banat News nga si Romarate ug si Quijote dunay pending nga kasong murder ug parricide tungod sa kamatayon sa bana ni Quijote nga si Wenceslao Quijote kinsa gidunggab patay sulod sa ilang balay pasado alas 12 sa tungang gabii niadtong Disyembre 21,2006.

"Ang mga relative sa bana ni Quijote nga kadtong gipatay nagtuo gyud nga si Romarate maoy suspek, lately lang nahibaw-an nila nga nag-live in ni si Romarate ug Quijote," asoy pang Moga.

Gisusi pa karon sa kapolisan kung si kinsa ang mga suspek nga mibanhig sa mga biktima. Samtang usa ka basiyo sa kalibre 9mm ang nakuha sa kapolisan diha sa crime scene.