Upat ka police sa Fuente gireklamo sa mga dinakpan

Nakontrobersya karon ang mga sakop sa Fuente Police Station human pasanginli sa duha nila ka dinakpan nga nagbutang-butang kanila og salaod ug gikatahong duna pay pasangil nga pagsuway nga i-negotiate ang pagkaaresto sa mga dinakpan.

Niadtong petsa 28 sa bulan sa Pebrero alas diyes sa kagabhion gidakop sa mga sakop sa Fuente Police Station sila si Edna Ababon, nga taga Sitio Hawod Compound, Bulacao dakbayan sa Talisay ug ang kauban niini nga si Mary-Ann Busaco, biyuda nga nagpuyo ra usab sa susamang dapit.

Sila si Ababon ug Busaco nasikop nila ni PO2 Bernabe Cañas Alegado, PO2 Tremaine Flores Sotto, PO1 Christopher Bacalso Torregosa, PO1 Emmanuel Alibango Blones, human giingong namalit og ginadiling drogas sa dalan B. Rodriguez St., Sitio Maharlika, Sambag ll ning dakbayan.

Ang kapolisan niadtong tungura giingong nipahigayon og saturation drive diha sa nahisgutang dapit diin giingong ilang nakit-an ang duha nga mipalit og gidudahang shabu diha sa usa ka pusher, apan human makuha sa duha ang shabu namatikdan sa pusher ang mga polis hinungdan nga miikyas kini ug nahibilin ang duha.

Dihang gisitar ang duha nakuhaan sila og wala ibutyag nga gidaghanon sa giingong shabu.

Apan ang mga abogado sa mga akusado nga sila si Atty. Ben Bongon ug Atty. Ireneo Morales miawhag sa piskaliya nga ibasura ang kasong possession of illegal drugs batok sa ilang mga kliyente gumikan kay huyang ang mga ebidensya batok sa duha.

Sa counter affidavit nga giduso sa duha ka mga akusado sa buhatan ni piskal Mario Gidayawan ug piskal Leceria Rabillas, gihulagway nilang way basihanan ang pagsang-at og kaso sa kapulisan tungod kay base sa sinumpaang pamahayag sa mga akusado didto sila dakpa sa ilang panimalay sa Bulacao dakbayan sa Talisay ug dili sa dalan B.Rodriguez.

Mipasangil silang sa wala pa sila dad-a sa Fuente police station gidala una sila sa luyong bahin sa Chong Hua Hospital diin giingong dunay pagsuway nga negosasyong gihimo ang mga polis aron sila buhian.

Usa sa mga testigong silingan sa mga akusado mitawag sa Talisay police kabahin sa mga armadong tawo nga misignit sa duha lakip na sa dos anyos nga anak ni Edna.

Samtang duna say nadawat nga tawag gikan sa usa ka cellphone ang usa sa mga kabanay sa mga akusado nga patawgon sa gihatag nga numero sa cellphone ug pangitaon ang usa ka ginganlan og "Junior" aron mabuhian si Edna.

Apan si PO2 Alegado kinsa maoy team leader sa maong operasyon mihimakak sa pasangil ug mipadayag nga andam nilang atubangon ang pasangil.

Matud pa niini nga sagad na kining pasangil nga himuon sa mga dinakpan ngadto sa mga polis nga makadakop kanila ilabi na kung ang krimen may kalambigitan sa drogas.