Duha ka bata ug tulo ka hamtong 'naghithit'

Tulo ka batan-ong lalaki ug duha ka minor de edad nga nag-pot session sa ikaduhang andana sa merkado publiko sa dakbayan sa Lapu-Lapu ang nadakpan sa kapolisan ug usa kanila ang nasakmitan og armas.

Ang nadakpan mao sila si Ermin Pino Rubia, 22, Andrean Treneson, 20, Niño Anthony Soronio Orbeta, 18 ug duha ka mga minor de edad nga 14 ug 16 anyos nga pulos lumolupyo sa Poblacion sa maong dakbayan.

Sila si SPO3 Mario Poblete maoy nakadakop sa akto sa lima ka suspetsado kinsa naghithit og marijuana sa usa ka hilit sa ikaduhang andana sa merkado.

Si PO3 Cerilo Lagumbay nga gikahinabi sa Banat News miingon nga ilang nasayran ang iligal nga kalihokan sa mga suspetsado human usab sila gitug-anan sa pipila ka lumolupyo.

Ang lima ka dinakpan ang gibalhog sa bilanggoan ug gipasakaan og tukmang kaso nga kalapasan sa Akta Republika 9165 kun Comprehensive Dangerous Drug Act of 2002.