Panahon na's paghiusa sa mga Pilipino — Gringo

Giawhag ni kanhi Senador Gregorio "Gringo" Honasan ang katawhang Pilipino nga sa pagbalik-lantaw sa diwa sa Edsa revolution niadtong 1986 nga mipalagpot sa diktadoriyang Marcos.

Si Honasan, kinsa usa sa paboritong bayani sa unang People Power sa Edsa, nanawagan sa mga Pilipino sa pagpadaplin sa panag-deperensiyahay sa usa'g-usa.

Matud pa niya nga panahon na nga maghiusa ang mga Pilipino aron makab-ot ang dugay nang gidamgo nga makaabante ang nasud ug makab-ot ang politikanhon ug ekonomikanhong kalambuan.

Sa nagsingabot nga eleksiyon, nagtuo si Honasan nga ang mga botante nakakat-on na sa resulta sa mga nanglabay'ng eleksiyon ug nga nagkinahanglang pilion ang mga kandidato nga 'advocate' sa Edsa.

Gitinguha ni Honasan nga ipadayon niya isip tipik sa iyang legislative agenda ang mas epektibo pa nga reporma ug social justice, gawas sa mga prayoridad sa nasud sama sa kampanya kontra terorismo, kahusay ug kalinaw ug maayong panggobyerno.