Joker Arroyo di mosuporta sa Sugbuak Bills sa Senado

Mahanaw ang pagka glamoroso sa probinsiya sa Sugbu ug ang kaanindot niini kun bahin-bahinon kini ngadto sa tulo ka mga probinsiya sumala pa sa senatorial candidate Joker Arroyo sa iyang pagbisita dinhi sa Sugbu.

Si Arroyo nagkanayon nga kon bahin-bahinon ang Sugbu mawala na usab ang pagka madanihon niini.

Gihulagway nga naila na ang Sugbu sa tibuok kalibotan labi na sa pag host sa 12th Association of South East Asean Nation niadtong Enero 10 hangtod sa 14 ug kini nagpasabot nga bisan gamay nga probinsiya kun itandi sa ubang dapit apan kini lig-on ug adunay ikapasigarbo sama sa natad sa industriya ug turismo.

Gipasalig ni Arroyo nga dili mosuporta sa Sugbuak Bills ug matud niya bisan kon kini usa ka lokal nga balaodnon mapaabot gihapon sa mga Sugbuanon ang iyang pagsupak niini sa ubos balay balaoranan.

Hinuon way komentaryo si Senador Arroyo kun mopirma ba siya og kasabotan O manifesto nga nag timailhan sa iyang pagsupak sa Sugbuak Bills.

Matud niya nga sila si Gobernador Gwendolyn Garcia ug mayor Tomas Osmeña wala mopresentar ngadto kaniya og dokumento nga kapirmahan sa iyang pagsupak sa Sugbuak Bills.

Sa nasayran ang One Cebu Party ni Garcia nihagit sa mga kandidato pagka senador nga mopirma og dokumento nga nagpadayag sa ilang pagsupak sa pagbahin-bahin sa Sugbu ug makapaabot kini og suporta sa partido.