Polis 'pusilan sa bugan sa kauban

Duha ka mga rookie nga mga polis ang nangalandig sa tambalanan human maunay sa usa sa mga armas nga ilang gidala diin usa kanila naigo diha sa bugan ug ang usa diha sa kamot kagahapon sa kaadlawon diha sa sitio Purok 3 Lower,Kamputhaw ning dakbayan.

Ang nangaangol giilang sila si PO1 Jemboy Kabristante,26, nagpuyo sa maong dapit ug si PO1 Anthony Peter Tano,taga Sambag Uno ning dakbayan.

Sumala pang SPO3 Dennis Moga, sa Homicide Section sa pakighinabi sa Banat News nga nanglakaw ang duha diha sa maong dapit dihang gikatahong duna silay nasigpatang tawo nga kadudahan ang lihok sa palibot.

Tungod niini, daling mibunot ang duha sa ilang mga armas ug si Kabristante mikasa sa iyang Norinco .45 pistola apan aksidente kining mibuto ug naigo ang iyang walang palad.

Apan ang bala milahos sa semento ug mibanda diha padulong sa bugan ni PO1 Tano hinungdan usab sa pagkaangol niini. Ang duha parehong gidala sa Chung Hua Hospital alang sa pagpatambal.

Si Kabrisante nga sakop sa Cebu City Police Office ug nadestino sa Mambaling police station pabilin pang giatiman sa maong tambalanan.

Samtang si Tano kinsa nadestino sa station 1 sa Mandaue City Police Office nga maoy nagrabehan gibalhin sa Perpetual Soccuor Hospital.

Ang armas ni Kabrisante ug Tano gikustodiya na karon sa kapolisan ug gitakdang ipailawom ang duha alang sa paraffin test.

Wala pa matino sa kapolisan kung ang duha hubog niadtong tungura sanglit wala na sila mapailawom sa liquor test.

Ang duha gikatahong manag-classmate kaniadto pa ug giingong dunay gibisita diha sa maong dapit nga silingan ra usab ni Kabrisante.

Si CCPO director, Patrociño Comendador mimando na nga imbestigahon ang maong kaso lakip na ang posibleng pagsang-at og kasong kriminal batok sa duha.

Samtang ang administrative motu propio investigation girekomendar ni Comendador nga adto paimbestigahan sa buhatan sa Internal Affairs Office sanglit naglambigit kini sa armas sa maong mga polis.

Kung mapamatud-ang sad-an nga nakahimo og serious neglect of duty ang duha hayan masuspenso sila ba kaha mataktak gyud sa serbisyo.