SCPC tukoron sa mga tunghaan sa Talisay batok frat

Mga ginikanan sa mga tinun-an sa high school sa usa ka tunghaan sa dakbayan sa Talisay nangayo og ayuda sa kapolisan sa siyudad para malikay sa fraternity ang ilang mga anak.

Kahinumduman nga sobra sa 50 ka ginikanan ang mianha sa buhatan ni Bise Mayor Aberdovey Belleza diin miduso kini sa ilang reklamo batok sa mga grupo sa fraternity kinsa giingong mi-recruit sa ilang mga anak.

Ang maong mga ginikanan nakugang dihang nakita niini ang mga bun-og sa lawas sa ilang mga anak kinsa gikatahong nalambigit sa hazing.

Si Police Superintendent Romeo Perigo, hepe sa kapolisan sa siyudad mibutyag kagahapon sa Banat News nga sa milabay'ng adlaw nakigtigom kaniya ang mga ginikanan sa maong mga batan-on diin gusto niini nga maprotektahan ang ilang mga anak batok sa fraternity.

Matud ni Perigo nga ang nahisgutang mga ginikanan nabalaka nga ang ilang mga anak malambigit og mga krimen kung masulod na kini sa fraternity.

Gibutyag usab ni Perigo nga ang grupo sa Bloods ug Crips gikataho nga mang-recruit usab kini og mga tinun-an sa elementarya.

Ang hepe miawhag sa mga ginikanan nga ang matag tunghaan sa siyudad angayang maglusad og Student Crime Prevention Council ug kung malusad na kini ang hepe sa kapolisan maoy kuhaong adviser niini para makahatag og mga ideya sa angayang mga buhaton para masulbad ang nahisgutang problema sa fraternity.

Ang SCPC langkuban sa mga tinun-an kinsa mga opisyal sa ilang tagsa-tagsa ka tunghaan.