Eskapo sa CPDRC gi-monitor sa Carcar police

Higpit nga gimonitor sa kapolisan sa lungsod sa Carcar ang posibleng pagpauli sa mi-eskapong binilanggo sa Cebu Provincial and Rehabilitation Center (CPDRC) nga si Gilbert Palang.

Si SP01 Joel Pananganan nga gikahinabi sa Banat News miingon nga si Palang, 22, mieskapo sa CPDRC Biyernes sa gabii kanhi nagpuyo sa Perelos uban sa iyang kapuyo nga babaye.

Dugang pa niya nga ilang gisusi ang kanhi gipuy-an niini ug ilang nasayran nga ang kapuyo nga babaye wala na usab sa maong dapit.

Kahinumdoman nga kuyog ni Palang sa pag-eskapo ang laing binilanggo nga si Rene Tabura, 23, nga lumad usab nga taga Carcar.

Kasong murder ang giatubang ni Palang ug kasong pagpanglugos ug murder usab ang giatubang ni Tabura nga pulos walay girekomendar nga piyansa ang korte alang sa temporaryo nilang kagawasan.

Nahibalik sa bilanggoan si Tabura sanglit nadakpan man kini sa mga jail guard pipila ka oras human namatikdan ang jail break.

Giimbestigar karon sa Committee on Investigation and Discipline sa Kapitolyo ang mga jail guard nga nadestino sa pagbantay sa CPDRC atol sa maong insidente.

Naglakip sa giimbestigar ang mga jailguard nga sila si Darwin Baja, Julius Genimedo, Charlie Batandulo, Michael Ricarte, Edgar Regis, Enrique Nangkil ug Dionaldo Delicano.

Si Capitol Consultant Bayron Garcia miingon nga ang maong mga jail guard ilang gituohang nagpabaya sa trabaho nga maoy nakaingon nga nahitabo ang jail break sa CPDRC.