Unlimited texting buot ipasuspenso ni konsehal Pacaña

Giawhag sa konseho sa siyudad sa Sugbu ang National Telecommunications Commission (NTC) pag-imbestigar niining kontrobersyal karon nga "unlimitxt promo" sa mga telecommunication company nga gikabalak-ang nipahimulos sa interes sa ilang mga konsumidor.

Si Konsehal Arsenio Pacaña, chairman sa committee on commerce and industry mopasar og resolusyon atol sa sesyon karong Miyerkules alang ning maong katuyoan human nigawas ang report nga gipatas-an karon ang presyo sa unlimitxt promo.

Nabutang sa maong report nga ang tag P10 matag adlaw nga unlimitxt, P25 sa duha ka adlaw ug P50 sa lima ka adlaw patas-an kini ngadto na sa P80 kon sobra sa 100 porsyento nga usbaw sa presyo.

Gumikan niini daghang mga konsumidor ug mga negosyante ang nanawagan sa NTC sa dinaliang pakisusi sa maong unlimitxt promo ug nidemanda nga temporaryong ipasuspenso ang maong promo nga wala moagi og public hearing aron pagsukod sa sintemento sa publiko.

Gipasabot sa konsehal nga kalapasan sa consumers welfare act ang maong lakang sa maong telecommunication company hinungdan nga giawhag niya ang NTC paghimo og subsub nga pakisusi niini.