Mga Martinez mipakagamay lang kang Salimbangon

Gamay ra alang sa banay'ng Martinez sa ikaupat nga distrito sa lalawigan sa Sugbu nga ikaatbang si kanhi Bokal Benhur Salimbangon ni Bogo Mayor Celestino "Tining" Martinez III sa pagka-kongresista sa umaabot eleksiyon.

"Benhur is not a big catch, it's no big deal," nagkanayun ang amahan ni Tining nga si kanhi Kong. Celestino "Junie" Martinez human gidawat ni Salimbangon ang nominasyon sa One Cebu Party ni Gob. Gwendolyn Garcia.

Si Salimbangon napilde na sa asawa ni Junie nga si Kong. Clavel Asas-Martinez niadtong 1998 ug gibiyaan kini og kapin sa 100,000 ka botos.

Matud pa ni Junie nga mismo sa presinto ni Salimbangon sa barangay Curva, Medellin napilde kini sa una niyang pagpapili sa pagka-kongresista.

Nahibulong kaayo si Martinez kon nganong gipadaku pag-ayo sa kampo ni Garcia ang ilang pagkakombinsi kang Salimbangon nga modagan sa pagka-kongresista.

"This shows that wala na sila'y laing makuha nga kandidato sa kwarto distrito.

Gihulagway ni Martinez nga mas lig-on karon ang ilang grupo itandi niadtong pagkapilde ni Salimbangon ilabi na nga siya ang modagan sa pagka-mayor sa lungsod sa Bogo.

Matud pa ni Martinez nga sa dihang nipapili si Salimbangon, ang incumbent nga mayor sa Bogo niadtong higayuna nga si anhing Reynaldo Dy, iya ni Salimbangon.

Samtang gitumbok ni Martinez ang pamilya ni Salimbangon nga walay palabra de honor sanglit humana siya sultihi nga dili na mausab nga magkaatbang sa politika ang ilang pamilya.

Sumala pa ni Martinez nga giingnan pa siya sa pamilya ni Salimbangon nga ang pagdagan ni Benhur niadtong 1998 atbang ni Clavel sayop kadto nga desisyon.