Nang-rape og bata gidakop sa kapolisan

Nadakpan sa kapolisan ang usa ka tawo nga gireklamo og pagpanglugos sa usa ka 6 anyos nga batang babaye nga paryente usab niini didto sa sitio Talisay, Poblacion, Boljoon sa miaging hapon.

Giila ni SPO4 Cristino Oraca sa kapolisan sa nahisgotang lungsod ang suspetsado nga si Eduardo Romeo nga nagpuyo sa nahisgotang lungsod. Ang nakadakop kang Romeo mao si PO3 Nicomedes Aliñabon.

Matud pa ni SPO4 Oraca nga gikan nga nagdula ang biktima ug gidala kini sa suspetsado sa daplin sa baybayon ug gilugos.

Dugang pa niya nga laing bata nga ilang silingan maoy nakamatikod sa paglugos sa bata ug mao kini ang mitaho sa ginikanan sa biktima.

Dali nga nakapangayog panabang ang mga ginikanan sa biktima kang PO3 Aliñabon nga maoy hinungdan nga kini gidakop.

Si SPO4 Oraca miingon nga ang kasong pagpanglugos ug kalapasan sa Akta Republika 7610 kun Anti-Child Abuse Act ang kasong ipasaka sa kapolisan batok sa maong dinakpan kinsa nagtingkagol karon sa bilanggoan.