14-anyos, laing 1 nangluba

Patay ang usa ka tigulang lalaki human gidunggab samtang naglakaw ug gisundan sa usa ka 14-anyos ug sa laing kauban sa miaging tungang gabii didto sa Ilihan, Tabogon, Cebu.

Si PO2 Jude Enemecio sa Tabogon nga nahinabi sa Banat News miila sa biktima nga mao si Gualberto Ouano, 56, minyo ug residente ra sa susamang dapit.

Siya namatay dihadiha human nakaangkon og samad dinunggaban sa iyang tiyan duol sa kutokuto.

Samtang ang gitumbok nga midunggab sa biktima mao si Ernie (tinuod nga ngalan gipugngan) 14 ug si Benjie Baobao Saldaga, 23, ug nagpuyo sa maong dapit.

Sila si SPO2 Samuel Malazarte ug PO3 Sonny Ceniza unang gisikop ni Manalili ug sa gihimong imbestigasyon, ang duha ka suspetsado nag-inom sa usa ka tindahan.

Ang biktima naglakaw ug miagi sa duha ka suspek diin sila nag-inom apan gisundan kini og gidunggab.

Si PO2 Enemecio niingon nga sa dihang gisukitsukit si Manalili mitug-an kini nga samtang nag-inom sila kalit lang siyang gimanduan ni Saladaga nga dunggabon ang biktima inig agi sa tungod apan kun dili siya motahod sa sugo gibaharan siya nga maoy patyon.

Igo lang mitalikod ang biktima sa atubangan sa duha ug gisundan ug gidunggab usa ka higayon. Nagtuo ang kapolisan nga gi-tripan lang sa duha si Ouano.

Dugang pang PO2 Enemecio nga ang duha lango na sa ilimnong makahubog niadtong higayona.

Gibutyag usab niya nga ang biktima permi usab kining mahubog sa ilimnong makahubog gani magsumparay hangtod nga matumba.

Ang kasong murder gipasaka na kagahapon sa kapolisan didto sa Bogo batok ni Saladaga samtang si Manalili ilang gitugyan sa Department of Social Welfare and Development aron mao una ang mokustodiya kaniya samtang minor de edad pa.