One Cebu mahimo marehistro

Marehistro pa sa buhatan sa Commission on Elections ang bag-ohay lang nahulma nga One Cebu Party nga gipanguluhan ni Gob. Gwen Garcia.

Kini sumala pa ni Atty. Edwin Cadungog, provincial election supervisor sa Sugbo isip katin-awan sa nalatid sa Resolusyon Numero 7707 nga naghan-ay sa mga kalihukan may kalabutan sa eleksiyon karong Mayo 14.

Base sa maong Resolusyon, Septiyembre 16, 2006 ra ang katapusang adlaw sa pagsang-at og petisyon alang sa pagrehistro sa usa ka politikanhong partido, kwalisyon sa mga partido, ug sektoral nga grupo nga mosalmot sa party-list system.

Apan matud pa ni Cadungog nga ang maong probisyon sa resolusyon alang sa mga partido nga mosalmot nga partylist system.

Gani nagtuo si Cadungog nga narehistro na ang One Cebu Party human kini gipahibawo ngadto sa publiko samtang gipahural na usab ang mga sakop niini.

Apan sa pagpakighinabi sa Banat News kang Cadungog kagahapon, matud pa niya nga walay tagal nga gimando ang Comelec sa pagrehistro sa mga politikanhong partido.

Matud pa ni Cadungog nga labing seguro nga sa dayun sang-at sa certificate of candidacy, may partido na ang kandidato sanglit ibutang man ang pangalan sa partido sa porma.

Ang pangalan sa tanang kandidato ug partido nga gipasakopan mapatik kini sa Voter's Information Sheet nga ipang-apod-apod sa mga botante sa dili pa ang adlaw sa eleksiyon.