Kritikal ang kahimtang sulod sa Vicente Sotto Memorial Medical Center ni Alberto Veloria, 51, lumad nga taga San Miguel Zamboanga del Sur ug kasamtangan nagpuyo sa nahisgutang dapit.
Siya nakaangkon og daghang pinusilan sa iyang duha ka paa, walang bukton ug tulo sa iyang lawas.
Si PO2 Leandro Azarcon nga nahinabi sa Banat News niingon nga tulo ka adlaw naabot si Veloria diha sa iyang mga ig-agaw gikan sa Zamboanga.
Si Veloria niadtong tungora nagbitbit og pinuti ug giingong nanggukod sa mga tawo nga mangagi.
Matud ni PO2 Azarcon nga dihay usa ka babaye nga minor de edad ang gisuwayan og tigbas ni Veloria apan nakadagan ug wala maigo sa pinuti.
Ang mga silingan nakahukom na lang nga manawag og polis.
Ang Alert Team nga gipangulohan ni SPO3 Romeo Hurboda uban nila ni PO2 Julius Paraquez, PO2 Ricardo Abellana ug PO2 Allan Villasorda maoy mitubag sa alarma.
Pag-abot sa mga polis ilang naabtan si Veloria nga nanggukod og mga tawo hinungdan nga ila kining gipasalbahan isip warning shot.
Gibadlong ni PO2 Abellana apan siya na hinuon ang gisuwayan og tigbas apan wala makaigo sa polis.
Si PO2 Paraquez maoy unang mipusil sa walang bukton ni Veloria apan inay mohunong sa iyang pag-amok nagpadayon hinuon pag-atake ni PO2 Abellana.
Giusban na usab og pusil ang duha ka paa ni Veloria nila ni PO2 Villasorda ug PO2 Paraquez apan bisan sa mga samad nga iyang naangkon nagpadayon gihapon og warawara sa pinuti hinungdan nga napugos na lang ang mga polis pagpusil kaniya sa lawas.
Dugang nasayran sa kapolisan si Veloria giingong wala makatuman sa iyang obligasyon aron mamahimong usa ka mananambal.