Si Biaño kinsa mikandidato na pagka-konsehal sa pipila ka piniliay isip independente nahibalik sa kampo sa mga Ouano human sa pipila na ka piniliay nga nakalabay.
Samtang si Kapitan Domacian kinsa kanhi chief security officer sa Norkis Trading Industries sulod na sa 17 ka tuig nakahukom sa pagretiro sa katungdanan ug mitipon sa kampo ni Mayor Thadeo Ouano.
Ang duha nga gipresentar ni Jonkie ngadto sa mga tigbalita niadtong miaging adlaw maoy nalakip sa ilang line up ni Konsehal Carlo Fortuna nga maoy tandem niini alang sa pagka bise mayor sa dakbayan sa Mandaue.
Kahinumdoman nga atol sa kasaulogan sa adlaw nga natawhan ni Jonkie sa miaging tuig iyang gipresentar ang pipila niini ka mga kandidato alang sa pagka konsehal sa piniliay karong Mayo 14, 2007.
Kini naglakip kanila ni Looc Barangay Kapitan Editha Cabahug, Tabok Barangay Kapitan Emiliano Rosal, Ibabao Estancia Barangay Kapitan Alfredo C. Ouano, Dr. Noeleen Borbajo, Jefferson Ceniza, Alfonso Albaño Jr., Beethoven Andaya ug ang magpasubli sa katapusang termino nga si Konsehal Procopio Villanueva.
Sa nasayran nga sila si Kanhi Konsehal Magno Dionson, Bise Mayor Amadeo Seno Jr ug Konsehal Jonas Cortes maoy ikasakbang sa kampo ni Jonkie.
Samtang ang tandem ni Ouano nga si Konsehal Fortuna maoy ikasakbang ang tandem ni Cortes nga kandidato alang sa pagka bise mayor nga si Konsehal Glenn Bercede.
Ang line up ni Cortes ug Bercede kumpleto usab alang sa pagka-konsehal.
Si Centro Barangay Kapitan Frionillo Latonio nga kandidato usab sa pagka konsehal ni Cortes nga gikahinabi sa Banat News miingon nga ang ilang line up gilangkoban usab sa pipila ka barangay kapitan sa dakbayan.