Napalgan na lang nga wala nay kinabuhi sa kasagbutan duol sa panimalay sa iyang hinigugma ang biktimang giila sa kapolisan nga si Bernan Sotousidad, hingkod, minyo ug residente sa nahisgutang dapit.
Ang biktima dunay samad pinusilan sa walang paa ug nilapas ang bala sa ibabaw'ng bahin sa tiil ug walang pulso agi sa wala pa matinong kalibre sa armas nga maoy gigamit sa mamumuno.
Segun sa report sa kapolisan, ang biktima dunay kasong pagpatay sa maong lungsod apan wala kini madakpi kay nagtago-tago human makahimo sa maong salaod.
Ang kapolisan nakadawat og tawag sa telepono ni Tinubdan barangay kapitan Juanito Ybañez kabahin sa maong hitabo.
Daling miresponde ang kapolisan nga gipangulohan ni SPO1 Nero Mansanarez, PO2 Bricio Orquez, PO1 Dario Coyuca.
Sa gihimong imbestigasyon, nasayran nga ang biktima naabtan sa kapolisan nga nagbuy-od sa may kasagbutan sa nahisgutang dapit 30 metros ang gilay-on gikan sa panimalay sa iyang hinigugma.
Ang mga silingan nakadungog ug upat ka sunodsunod nga sipang buto sa armas de fuego.
Nagtuo ang kapolisan nga giatngan nang daan nga moagi sa kasagbutan sa wala mailhing mamumuno ug gipusil.
"Ang wala nga pulso maoy naigo unya nilapos sa atubangan nga pulso. Naigo man ang bukog morag nabali unya nahutdan sad ni ang biktima og dugo," dugang asoy ni Castro.
Ang kapolisan padayon sa ilang gihimong imbestigasyon aron mailhan ang mamumuno sa biktima.
Wala usab gisalikway sa kapolisan ang personal nga motibo sa pagpatay.