Si Juveilyn Sotto, 23, tag-iya sa Ichiban Promotions nga nagbase sa Mansueto Village sa maong lugar nadakpan sa entrapment operation sa Criminal Investigation and Detection Group 7 niadtong Huwebes sa buntag.
Duha ka mga reklamante nga sila si Juvelyn Gemenez ug Amalia Roma maoy unang miduol sa CIDG7 ug mireklamong gipangayoan sila kaniadto ni Sotto og P2,500 isip bayad sa ilang medical certificate.
Gawas sa duha, duna pay laing unom ka mga babayeng biktima ang midangop sa CIDG ug misang-at gihapon og susamang reklamo.
Gikatahong gipasaligan sila niini nga makatrabaho sa Uropa ug sa Korea ug pareho na silang nakabayad og P2,500 matag usa ug nakasumitir na og mga dokumentos apan dangtan na lang og pila ka bulan wala pa gihapon sila makalarga.
Si Sotto kusganong mihimakak nga usa ka recruitment agency ang iyang kumpanya kundili talents and promotions lang kini diin magtuon ug hashasan ang mga aplikante sa ilang talento.
Si Sotto dihang gihinabi kagahapon sa Banat News nagkanayon nga gihikay na sa iyang mga abogado ang maong kaso ingon man bukas siya sa sabot-sabot.
Gihatagan og kinse ka adlaw nga waiver of detention sa CIDG7 si Sotto aron pagtubag sa pasangil batok kaniya.