Si Cebu City Police Office director, Sr.Supt. Patrociño Comendador mitug-an sa Banat News kagahapon nga ilang ikumparar sa miaging tuig (unang duha ka kwarter) ang masakmit nga drogas ug ubang mga ebidensya karong mga bulana atol sa campaign period.
Matud pang Comendador ilang susihon nga unsa kadaghan ang suplay sa iligal nga drogas nga giapod karon sa dakbayan, gidak-on sa kwartang nalambigit sa drogas, gidaghanon sa mga madakpan ug uban pa.
Pinaagi niini matino sa kapolisan kung may dakong kausaban nga pagsaka o pagkunhod, nagtuo ang direktor nga kung modaghan ang suplay, modako ang kwartang nalambigit sa mga transaksyon ug uban pa posibleng dunay kalambigitan kini sa piniliay.
'We will closely monitor the flow of data and compare it to the previous year if there are changes or sudden rise of arrest, amount involved and confiscated illegal drugs," asoy pang Comendador.
Si Supt. Pablo Labra, hepe sa Criminal Investigation and Intelligence Branch sa CCPO mitug-an sa Banat News nga gipalawman na karon ang ilang operasyon sa pagpaniid sa mga kalihukan sa mga drug personalities gawas pa sa pagmonitor sa ubang mga butang may labot sa eleksyon.
Bisan ang gidaghanon sa suplay sa iligal nga drogas nga mosulod dinhi sa Sugbu gimonitor usab sa kapolisan base sa mga makuhang ebidensya ug impormasyon matag operasyon tungod sa pagtuong posibleng ang halin gamiton sa mga hiwing politiko.