Giliog og tigbas patay

Patay ang usa ka 36 anyos nga lalaki human tigbasa sa makadaghang higayon lakip na sa liog sa wala mailhing tawo kagahapon sa kaadlawon sa Kagwangan, Tarong lungsod sa Madridejos.

Dead on arrival sa Bantayan District Hospital ang biktimang giila sa kapolisan mao si Eduardo Medallo Caranzo minyo nga taga Marikaban Sta. Fe.

Si Porferia Caranzo ig-agaw sa namatay mitug-an sa kapolisan nga nianang pasado alas 3 nanaog siya sa iyang panimalay ug iyang nakit-an ang tawo nga mitigbas ngadto sa biktima sa makadaghang higayon.

Si Porferia nagkanayon nga wala gyud siya makaila sa gikatahapan tungod sa kangitngit sa nahitaboan ug dali kining misibat.

Sa imbestigasyon nga gihimo ni SPO1 Manolo Jo nasayran ang biktima igo lang nibisita sa iyang mga ig-agaw sa maong dapit.

Apan nakakita kini og lalis nga laing tawo pasado ala una sa kaadlawon sa wala pa mahitabo ang pagpanigbas.

Ang biktima nakaangkon ug daghang samad tinigbasan diha sa iyang tuong abaga, ulo, ug liog hinungdan sa kamatayon niini.

Sa pagkakaron ang kapolisan padayong nagsusi sa maong hitabo kon unsay motibo sa pagpanigbas sa gikatahapan ngadto sa biktima.