Misulod sa balay sa polis gidakop

Nasikop ang usa ka armado nga lalaki nga misulod sa balay sa usa ka polis niadtong Martes sa hapon diha sa Sitio Bugna, Jaclupan Talisay.

Ang suspetsado nasakmitan og usa ka shotgun nga dunay tulo ka buhing bala ug usa ka pinote nga dunay gitas-on nga 23 pulgada.

Natingkagol karon diha sa Talisay city police detention cell si Ronald Ocariza 22, residente sa nahisgutang lugar human kini masikop ni PO1 Esperidion Espina nga residente usab sa maong lugar, usa ka polis nga nadestino diha sa Special Reaction Unit (SRU) sa Cebu Provincial Police Office (CPPO).

Base sa imbestigasyon ni PO2 Roy Lofranco sa Talisay Police Station nga si Ocariza misulod diha sa balay ni Efrena inahan ni PO1 Espina samtang ang biktima wala diha sa iyang balay.

Si Ocariza gikatahapan nga mangawat unta kini apan demalas kay nasakpan.

Sa affidavit ni PO1 Espina nga giduso diha sa kapolisan sa Talisay nagkanayon kini nga midagan si Ocariza dihang iya kining gisita ug nagpaila siya nga usa ka polis apan iya kining naapsan ug gitugyan diha sa kapolisan sa Talisay. Pasakaan kini og kaso.