Si Valmoria na ang bag-ong CPPO, samtang si Ingking ang sa BPPO

Bag-o na ang hepe sa Cebu Provincial Police Office (CPPO) human sa Southeast Asian Nations Summit.

Si Sr. Supt. Carmelo Valmoria, Chief of the Regional Operations and Plans Division sa Police Regional Office 7 maoy bag-ong molingkod isip bag-ong director sa Probinsya sa Sugbo hulip ni Sr. Supt. Vicente Loot kinsa bulontaryong nagpadistino human sa Asean Summit.

Si Police Regional Office Director Silverio Alarcio Jr. sa pakighinabi sa Banat News kagahapon miingon nga ipahigayon unya ang pag-turn over ni Loot ngadto ni Valmoria sa CPPO apan wala kini motug-an kun kanus-a kini nahitabo.

Hinuon, matud ni Alarcio, ang duha ka opisyal molingkod sa ilang puwesto human pa sa Asean Summit.

Si Valmoria katulo ka higayon nga nahimong miyembro sa United Nations Peace Keeping Force ug gidestino sa nasud sa Cambodia, Kosovo ug Somalia.

Si Valmoria ug Loot ingon man si CIDG-7 director Sr. Supt. Jorge Corpuz sa Philippine Military Academy nitapos sa class '82.

Wala pa usab mahibaw-i kung kinsang opisyal ang mohulip sa puwesto ni Valmoria sa ROPD.

Sa pagka karon si Loot temporaryong idestino diha sa Regional Headquarters Service Group sa PRO 7 human niya serbisyohi ang CPPO dul-an sa duha ka tuig.

Dugang pang Alarcio, ang duha magpabilin sa ilang puwesto ug magpadayon sa ilang tagsa-tagsa ka gimbuhaton sa Asean Summit.

Si Loot maoy mo-supervise sa Task Force Mactan samtang si Valmoria maoy gitahasan sa Operation sa nagpadayon nga Asean Summit.

Matud ni Alarcio, ang maong lakang direktang gihimo gikan sa General Headquarters sa Camp Crame apan mokonsulta una siya ni Cebu Governor Gwendolyn Garcia.

Sa laing bahin, si Sr. Supt. Edgardo Ingking sa Regional Headquarters Service Group maoy mohulip ni Bohol Provincial Office Director Sr. Supt. Arthuro Evangelista.

Si Evangelista madistino diha sa RHSG sa PRO 7.