Ang namatay mao si Antonio Baysa Sr., 78, biyudo ug residente sa maong lugar ug usa ka sakop sa Bantay Dagat.
Si Sr. Insp. Antonio Cuyos, hepe sa San Fernando Police Station, nga nahinabi sa Banat News miingon nga ang anak sa biktima nga si Catalino Baysa kinsa maoy kapitan sa maong lugar milusad og pagbantay sa kadagatan uban sa mga sakop sa Bantay Dagat nunot sa nagpadayon nga Asean Summit sa dakbayan sa Sugbo.
Matud ni Cuyos ang biktima nag-una og lakaw sa grupo sa iyang anak paingon sa outpost sa Bantay Dagat nga dunay gilay-on nga 70 metros gikan sa baybayon paingon sa nahimutangan sa tunga sa dagat.
Si Catalino uban sa mga sakop sa Bantay Dagat maoy nakakita sa lawas sa biktima nga naglutaw sa dagat nga wala nay kinabuhi.
Nagtuo si Sr. Insp. Cuyos nga samtang naglakaw paingon sa outpost ang biktima may natumban sa ilawom sa dagat ug natapigas ang tiil hinungdan nga natumba kini ug tungod usab sa iyang pangidaron, wala makabangon dayon.
Matud niya nga niadtong mga orasa linaw ang dagat ug dili dagko ang bawod.
Apan bisan nga gituohang nalumos ang biktima ipailawon gihapon sa kapolisan sa pag-autopsy aron masuta kun walay foul play ang kamatayon niini.