Simbahan mosuporta'g kandidato; politikos ok

Suportado sa pipila ka mga politiko dinhi sa dakbayan sa Sugbo ang desisyon sa Simbahang Katoliko dinhi sa Sugbo nga mo-endosar na og mga kandidato nga pabotaran ug dili pabotaran karong umaabot nga piniliay sa bulan sa Mayo.

Alang kang Mayor Tomas Osmeña dako kaayo siyang uyon aron usab patas ang mga religious sector nga makatuboy og mga kandidato.

Usa sa gitumbok ni Osmeña mao ang Iglesia ni Kristo nga sa matag eleksiyon mosuporta gyud og ilang kandidato nga paluyohan.

Gikonsiderar sa mayor nga makahatag og dakong impluwensiya ang Simbahang Katoliko sa mga kandidato nga mahukman niining suportahan apan iyang gihulagway nga minus kini og epekto sa mga lokal nga kandidato.

Kini tungod kay nagtuo si Osmeña nga nakaila ang mga botante sa mga lokal nga kandidato gikan sa pagka-kongresista, gobernador, bise gobernador, provincial board, mayor, bise mayor ug mga konsehal.

Gani gipadayag ni Osmeña nga siya sa iyang bahin sa iya unyang pagpapili sa ikatulo ug katapusang termino karong Mayo dili siya mangulitawo sa Simbahang Katoliko ug dili direkta niyang pangulitawhan ang mga Sugboanon tungod kay isyu kini sa politika ug dili sa simbahan.