Kasabutan sa ASEAN leaders gihulagway nga makaapekto sa OFWs

Kasabutan nga lagdaan tali sa mga miyembro sa Asean leaders makaapekto sa mga migrante ug Overseas Filipino Workers (OFWs), sumala pa sa mga militante.

Ang Alyansa sa Mamumuo sa Sugbo-Kilusang Mayo Uno misaway nga walay ayo ang gidusong deklarasyon mahitungod sa mga migranteng mamumuo kon Declaration on Migrant Workers sa Associaton of Southeast Asian Nations (ASEAN) Summit.

Giingon sa grupo nga mas mosamot pa unya nga luoy ang daang kondisyon sa mga Overseas Filipino Workers.

Suma pa sa AMA-SUGBO-KMU nga wala sila maglaom nga ang kasabutan moresulta og mas dakong suholan tungod kay dunay probisyon niini sa pag-uniform o pagpareha sa suholan sa tanang migranteng mamumuo sa rehiyon.

Gilatid sa grupo nga gihimo ang kasabutan nga instrumento sa mga dagkong kompaniya aron paubson ang suhulan sa mga nagtrabaho didto sa gawas sa nasud.

Matud ni Wennie Badayos, Chairperson sa AMA-SUGBO-KMU nga itandi sa suweldo sa ubang nasud nga nag-export og mga mamumuo sama sa Vietnam, Cambodia ug Indonesia, ang Pilipinas mas taas og minimum nga suweldo.

Dugang pa ni Badayos nga disbentaha ni kung himuong uniform ang suholan sa rehiyon.

Ang mga dagkong kompaniya lang sa US ug Japan ug uban pang adunahang nasud ang makabenespisyo niini.