Si Hazel Bathan, election assistant, mibutyag kagahapon sa Banat News nga dili sila makatagad og daghang magparehistro tungod kay usa lang ang ilang ekipong gamiton sa pagkuha og hulagway ug pagkuha sa pirma sa mga magparehistro.
Ang Comelec sa dakbayan makarehistro ra og 250 ka tawo kada adlaw ug sobra pa unta sa maong gidaghanon ang ilang matagad kung duna pa silay dungag nga data capturing machine.
Niadtong Agosto 2005 gisugdan ang pagpangrehistro sa Comelec og ang deadline niini niadtong Disyembre 31, 2006 apan aduna pay daghang mihangyo sa buhatan sa Comelec karon nga gustong magparehistro.
Matud ni Bathan nga taas kaayo ang gihatag nga lugway sa comelec para sa pagpangrehistro apan kasagaran motungha sa ulahi nang mga adlaw.
Base sa talaan sa Comelec sa siyudad adunay natalang 9,500 ka bag-ong botante gikan sa Agosto 2005-Disyembre 2006.
Si Bathan mibutyag usab nga ang Comelec adunay natalang 83,340 ka botante sa Septiyembre 2006.
Sa laing bahin, si Bathan nagkanayon nga karong petsa 15 niining buwana hangtud Marso 29, 2007 ang filing of candidacy sa local elective position ug sa petsa 15 usab niining buwana hangtud sa Pebrero 12, 2007 ang filing of candidacy sa Senador.