Ang patayng lawas nga napalgang nanimaho na ug niaksyon na kadugta mao si Concordia Barangan 35, ug ang anak niining si Alejandre Barangan Jr. usa ka tuig ang pangidaron ug residente sa maong lugar.
Segun sa report sa kapolisan ang atabay dunay giladmon nga unom ka tiil ug maoy kuhaanan og tubig sa mga residente.
Si Astantino Imbudo ig-agaw sa namatay maoy nakadiskobre sa patay'ng lawas dihang nagsag-ob kini ug tubig sa atabay sayo kagahapon sa buntag.
Sa gihimong pakisusi sa kapolisan nasayran nga niadtong adlaw'ng Domingo ang bana ug si Concordia naglalis sa wala pa matinong hinungdan.
Niadtong tungora human sa ilang panaglalis giingong nilakaw ang bana sa ilang panimalay ug pagka taudtaod nisunod usab paglakaw si Concordia dala ang usa ka tuig nilang anak.
"Wala nalang pangitaa(Concordia) sa mga ginikanan niadtong Domingo kay nagtuong miapas sa bana. Taga didto man sa Carcar pero hangtod karun wala kuno mouli sa ila" asoy ni PO2 Jojit Aba dihang nahinabi sa Banat News kagahapon.
Matud ni Aba nga nahibulong si Astantino Imbudo kay miungot ang kabo ilawom sa atabay pero nakatimaho na kining daan ug panglisbo sa baho sa patay.
Gibutyag ni Aba kompirmado nga dunay gamay nga deperensya sa pangisip si Concordia kay sa wala pa kini makasal sa iyang bana gidala na kini sa Vicente Sotto Memorial Medical center aron ipahiling ang pangisiip niini kay namatikdang magyawyaw nga nag-inusara.
Sa pagkakaron ang mga kabanay dili interesadong ipailawon sa autopsy ang duha ug ila nalang ipahigayon ang paglubong kagahapon adlawa.