Ang maong mga sakyanan maoy gigamit sa pagpatrolya sa kapolisan sa unom ka presinto ug ingon man usab ang ilang pagtubag sa mga alarma.
Gilangkuban sa pito ka Nissan terrano ug unom ka multicab ang sakyanan sa kapolisan sa MCPO nga giabangan sa kagamhanan sa maong dakbayan sa RDAK Transport Equipment ug natapos ang kontrata niadtong Disyembre 31 sa miaging tuig.
Si Mandaue City Police Director Sr. Supt. Alexander Abadinas nga gikahinabi sa Banat News miingon nga ang maong suliran gipangitaan na og sulbad ni Mayor Thadeo Ouano atol sa ilang panagtagbo.
Matud pa niya nga mag-agad lamang siya kang Ouano kun unsay makab-ot niining hukom kun ipadayon pa o dili ang pag-abang sa maong mga sakyanan sa RDAK.
Gipaneguro ni Abadinas nga magpadayon ang serbisyo sa kapolisan alang sa pagpatuman sa kahapsay ug kalinaw pinaagi sa pagdestino niini sa mga lugar nga anaa ang kakuyaw sa krimen.
Dugang pa niya nga gihangyo na lamang usab niya ang iyang mga sakop sa temporaryong paggamit sa kaugalingon nilang mga sakyanan sa pagtubag sa alarma ug ang paggamit sa gi-allocate nga gasolina sa MCPO.
Matud pa niya nga kini ang labing gikinahanglang pagahimoon aron dili maapektohan ang ilang trabaho sa pagpatuman sa kahapsay ug kalinaw sa dakbayan sa Mandaue.