Ang nawad-an sa iyang armas mao si Inspector Reynaldo Dalida Francisco,39, lumad nga taga San Jose, Rodriguez, Rizal ug kasamtangang nadestino isip Intelligence Officer sa Aklan Provincial Police Office sa Rehiyon 6.
Bugtong nakuha nga timailhan sa taxi nga gisakyan sa mga biktima mao ang numero nga "842" apan ang ngalan sa taxi wala makuha sa biktima.
Si Inspector Michael Anthony Bastes, ang deputy chief sa Theft and Robbery Section, nga ka-batch sa maong opisyal, mitug-an sa Banat News nga mianhi dinhi si Francisco aron paghikay sa iyang papeles para sa promosyon pagka Senior Inspector.
Sumala pang Bastes dunay tulo ka kaubang Inspectors si Francisco sakay sa maong taxi gikan dinhi sa Health Services sa Camp Sotero Cabahug padulong sa HRDD sa PRO-7.
Ang backpack ni Francisco nga kolor itom ug lightgreen nga gisudlan sa iyang 45 kalibre pistola nga may serial number BA04477, tulo ka magazines nga puno sa bala, sapatos, kumpletong orihinal nga kopya sa papeles para sa promosyon ni Francisco nga diha gibutang sa baggage compartment maoy nadala sa taxi.
Matud pa human manganaog ang mga opisyal ug padulong na sila sa HRDD, kalit misutoy ang taxi ug dihang ilang gigukod layo na kini kaayo, hangtud ning pagsulat sa balita wala iuli sa maong taxi driver ang maong bag.
Miapelar ang maong opisyal sa bisan kinsa o ba kaha ang taxi driver mismo sa pag-uli sa iyang butang ilabi na sa mga papeles.