Gipusil human manaog sa bus, lalaki naangol

Naangol ang usa ka lalaki human gipusil sa usa sa duha ka wala mailhing tawo nga pulos armado sa wala pa matino nga kalibre sa armas dihang igo lang gipakanaog sa minibus de pasaheroan sa miaging gabii pasado alas 8 didto sa Campusong Borbon Cebu.

Si P/Insp. Alexander Ancao, hepe sa Borbon nga nahinabi sa Banat News miila sa biktima mao si Darwin Albiso, 36, dunay kapuyo nga si Girly Orque, 23, ug napuyo sa nahisgutang lugar.

Duha ka wala mailhing lalaki gitumbok nga suspek sa pagpusil ngadto sa biktima.

Sumala pa ni Ancao ang biktima uban sa iyang kapuyo gikan sa dakbayan sa Sugbo.

Gibutyag ni Ancao ang duha ka armadong tawo giingong nag-istambay nang daan sa lugar ug ingon sa dunay gipaabot apan ang mga tawo wala lang magpakabana aron pagtaho ngadto kanila.

Sa dihang nanganaog sa biktima ug ang kapuyo niini naglakaw sa dalan ug gipusil ang biktima sa usa sa duha.

Tulo ka samad pinusilan ang naangkon sa biktima diha sa bukton , dughan ug hawak ug gituohan sa kapolisan nga kalibre .38 rebolver ang gigamit kay walay nakuha nga kabhang sa crime scene.

"Sa among nadawat diri nga impormasyon kining lalaki dako kunong minyo unya ang babaye kay pinaangkan dili mana taga diri ang lalaki, ang babaye hinuon maoy taga diri usa na sa among susihon sa among imbestigasyon" dugang asoy niya.