Ang maong pasidaan gipalanog sa Department of Public Service (DPS), pinaagi sa hepe sa garbage dispatching section Alfredo Inocando kinsa nakadawat og daghang reklamo kalabot sa giingong manakasaka sa kabalayan nga magpailang basurero sa gobyerno unya mangayog pinaskohan.
Matud pa ni Inocando nga daan na silang gipasid-an ni Engr. Dionesio Gualeza, hepe sa DPS nga angayang tumanon ang eksistidong balaod nga nagdiling higpit sa tanang opisyal ug kawani sa gobyerno sa pagdawat og mga gasa o pinaskohan ilabi na ning panahon sa pasko.
Si Inocando mibutyag nga usa sa bag-o niyang nadawat nga reklamo mao ang gikan sa mga madre St. Mary's Academy of San Nicolas kinsa naka proper dawat og "solicitation letter" gikan sa nagpailang mga garbage collector sa siyudad.
Dihang gisusi ni Inocando, nasayran niya nga ang mipirma sa maong suwat, usa ka kanhi basurero nga gitangtang na sa katungdanan gumikan sa iyang kabadlungon.
Busa giawhag ni Inocando ang katawhan nga kon may mangayo og pinaskohan sa ilang balay ipasusi una sa buhatan sa DPS kon lihitimo bang basurero sa siyudad ang nangayo ug kon dili lihitimo mas maayong ipadakop kini sa mga otoridad.
Kon kini ilegal nga basurero, kapasakaan siya'g kiha nga mas bug-at pag silot sa dawaton, kay sa basurerong tinuod, matud pa ni Inocando.