2 batan-on gisikop atol sa buy-bust

Duha ka mga batan-ong lalaki nasikop sa kapolisan human sa gipahigayong buy bust operation niadtong Lunes sa gabii didto sa Damulog, Sogod Cebu.

Si Insp. Alvin Ballo hepe sa Sogod Police Station ang nangunay sa maong operasyon nga miresulta sa pagkasikop sa duha nga sila si Teofilo Flores 29, ulitawo nagpuyo sa maong lugar ug Alfin Rivera, 24, ulitawo nga taga Tabunok sa mao gihapong lungsod.

Si Flores nakuhaan og tulo ka pakete nga gituohang may sulod nga shabu, P200 nga marked money ug laing P500 nga gituohang halin sa pagpamaligya sa ginadiling drugas, samtang duha ka pakete sa shabu, usa ka tin foil ug usa ka disposable lighter.

"Kanang duha naa na sa among watchlist diri nga noted gyud nga namaligya sila og drugas, dugay na namo silang gipanid-an. Kana si Rivera atol sa operation diha na siya nidagan man, among gyung nakuhaan og butang," matud ni PO3 Elymar Mendoza sa Sogod Police dihang nahinabi sa Banat News kagahapon.

Karong adlawa gikatakdang ipasaka ang kasong paghupot ug pagpamaligya og ginadiling drugas sa piskaliya.