Kini subay usab sa letter of instructions(LOI) gikan sa Campo Crame sa ilang programang "Iwas Paputok" alang sa luwas sa selebrasyon.
Kagahapon, ang Parian police station ug Mambaling police station palang ang nakasumitir ug miila sa mga dapit diha ilawom sa ilang mga hurisdiksyon diin mahimong makapabuto.
Sagad sa napiliang mga dapit mao kadtong mga basketbolan, sports complex ug mga bakanteng lote sa matag barangay nga layo sa mga kabalayan aron luwas usab sa disgrasya ug sa sunog.
Napiling mga lugar mao ang atubangang bahin sa Parian police station, luyong bakanteng lote sa Day-as barangay hall, diha sa kalsada sa barangay T.Padilla, sa Camagayan mao ang basketball court atubangan sa Sto.Rosario church, sa Lorega mao ang karaang ihawan ug atbang sa barangay hall.
Samtang diha sa Mambaling mao ang mga sports complex sa mga barangay ilawom sa ilang hurisdiksyon ingon man mga bakanteng lote lakip na sa South Reclamation Project.
Karong adlawa mao'y katapusang adlaw sa mga police station sa CCPO sa pagsanong sa maong kamandoan.
Ang maong LOI naglangkob usab og kamandoan sa kapolisan pagkumpiskar sa mga gibawal nga mga pabuto nga kadtong makadisgrasya sa mogamit niini.
Samtang lakip sa kamandoan mao ang pagpasaka og kaso ngadto sa mga tawong masakpang mopabuto og armas ug mamaligya og mga gibawal nga pabuto ug kadtong namaligya niini nga walay mga permit.