'Kawatag' wire gipusil patay

Patay nang napalgan sulod sa usa ka panimalay sa Lower Malibo, Subangdaku, Mandaue ang gitumbok nga kawatan og wire sa kuryente human kini pusila sa wala mailhing tawo sa milabay'ng gabii.

Ang biktima mao si Lucresio Buhawi Jr. 26 alyas Opao, minyo, lumad sa Sitio Highland, Alang-alang, Mandaue.

Base sa imbestigasyon ni PO3 Nersas Baay sa Station 2 sa Mandaue City Police Office nasayran nga samtang nangatulog na si Junray Salino uban sa iyang kapuyo kalit lamang nadungog ang tulo ka lanog nga buto ug sa paggawas ni Salino sa lawak, iya na lang nakita ang usa ka tawo nga anaa sa iyang sala nga nagkadugo ug wala nay kinabuhi.

Gumikan sa maong hitabo, mitawag kini sa Station 2 sa Mandaue ug sa pagresponde sa mga polis, patay na kini human mahiagum og tulo ka samad pinusilan sa iyang ulo ug abaga agi sa kalibre .45 ug .38.

Matud pa ni PO3 Baay nga posibleng buot kini magpakitabang sa banay'ng Salino human kini mapusili hinungdan sa pagpugos niini pagsulod agi sa pultahan sa sala apan walay suwerte kay nakabsan kini sa kinabuhi.

Nakuha usab sa kapolisan ang mga kabhang sa kalibre .45 ug .38 duol sa patay'ng lawas ni Buhawi.

Ang mga silingan sa biktima mitumbok nga si Buhawi notadong kawatan og wire sa kuryente uban sa iyang higala nga si Edgardo Cauba alyas Ontoy nga silingan ra sa biktima ug maoy kuyog niini sa pagkig-inom sa wala pa mahitabo ang pagpusil sa biktima.

Gumikan niini, gisikop si Cauba ug gipaubos sa paraffin test sa PNP Crime Laboratory aron masuta kun wala ba kini kalambigitan sa maong krimen, samtang padayon pa gihapon ang pagsuhid sa kaagi ni Buhawi human kini masuta nga daghang patik sa kalawasan.