Ex-hepe sa Carcar 'tiyabaw sa isyu vs niya

Kanhi hepe sa Carcar Police Station mihimakak sa pasangil nga ang iyang mga sakop pulos hubog ug labaw pang siya dili usab hubog atol sa kasaulogan sa pista sa maong lungsod sa miaging semana.

Si Supt. Teofilo Siclot nga nahinabi sa Banat News kagahapon nagkanayon nga nasurpresa siya sa nanggawas nga balita nga siya wala makaatiman sa mga gimbuhaton atol sa pista.

Gani matud sa report nga si Mayor Mario Patricio Barcenas sa Carcar mao ang nag-atiman sa traffic sa kadalanan nga naghuot ang mga sakyanan.

Suma ni Siclot nga iyang gitawagan ang mayor aron klarohon ang maong balita human migawas nga gidaot ang iyang ngalan ug sa kinatibuk-ang puwersa kapolisan apan ang mayor miingon nga dili siyay tinubdan sa balita nga nanggawas.

"Dili na tinuod ang tanan, diha rako sa police station bisan inyong susihon ang rekord didto," matud pa niya.

Apan si Siclot nagduda sa usa ka sakop sa Sangguniang Bayan sa nahisgutang lungsod nga maoy nagpaluyo sa tanan.

Siya nagdumili sa pagtug-an sa ngalan sa maong konsehal apan iyang gitug-an nga anaa kini masakop sa oposisyon.

Matud niya aduna silay nadakpan nga paryente sa maong konsehal gani natanggong na kini karon sa bilanggoan ug ang maong konsehal mihangyo kaniya niadtong Mayo ipa-release sa prisohan apan nagdumili siya tungod kay aduna kini complainant.

Daan na siyang nagplano nga magpabalhin og laing lungsod karon untang Enero sunod tuig human gikibhangan ang ilang budget sa konseho sa lungsod gikan sa P700,000 ngadto na lang sa P260,000 ang tibuok tuig.

Si Siclot nahimong hepe sa Carcar sulod sa usa ka tuig sugod niadtong Mayo 3, 2005.

Si Sr. Supt . Vicente Loot misaad nga iyang ipaubos sa imbestigasyon si Siclot kun mosang-at og reklamo ang mayor sa Carcar.

Kasamtangan unang gidistino si Siclot sa Provincial Security Group sa CPPO.